Ўзбекистон миллий жамоаси сардори Элдор Шомуродов жаҳон чемпионати гуруҳ босқич 2-тур доирасидаги Португалияга қарши баҳс олдидан матбуот анжуманида иштирок этди.
«Албатта, бизда босим йўқ. Шу сабабли Португалияга қараганда бизга осонроқ бўлади деб ўйлайман.
Бизда ажойиб жамоа шаклланган. Биринчи ўйиндан кейин бизда ишонч бор, аллақачон дебют қилиб бўлдик. Биз эртага яхши натижа учун майдонга чиқамиз.
Рақибимизнинг биринчи турдаги ўйинининг натижасига аҳамият бермадик. Бу ҳақида ҳозир ўйлашнинг пайти эмас. Балки учинчи турдан кейин буни муҳокама қилармиз, ҳозир биз учун энг асосийси навбатдаги баҳс.
Колумбияга қарши биринчи бўлимда мураббий кўрсатмаларини тўлиқ бажара олмаганимиз эвазига хатолар келиб чиқди деб ўйлайман. Эртага бундай хатоларни такрорламасдан, ўз ўйинимизни кўрсатишга, тўпни кўпроқ назорат қилиб, вазиятлар яратишга ҳаракат қиламиз.
Ҳаммаси яхши. Ҳаяжон бўлиши табиий, бироқ майдонга чиққан биринчи дақиқамиздаёқ бу эсдан чиқади.
Биз Аббос билан клубда ҳам бирга ўйнаймиз. Машғулотларда ҳам доимо биргамиз. Шу сабабли ҳам бир биримизни ўзаро яхши тушунамиз десам бўлади.
Энг муҳими бир жамоа бўлиб, яхши натижа қўлга киритишга ҳаракат қиламиз», — деди Шомуродов.
