Романо: “Барселона” Родри ва Канселу трансферларини ҳал қилмоқда

“Барселона” ёзги трансферлар дарчасининг сўнгги ҳафталарида бир вақтнинг ўзида Жоау Канселу ва Родри трансферларини ҳал қилишга яқин. Машҳур инсайдер Фабрицио Романо ўзининг навбатдаги видеосида каталонияликларнинг икки футболчи бўйича музокаралари, шунингдек, “ПСЖ”, “Манчестер Сити” ва бошқа клубларнинг бир қатор трансфер режалари ҳақида маълумот берди.

Романонинг таъкидлашича, “Барселона” Родри бўйича “Манчестер Сити”га учинчи таклифини тақдим этган. Томонлар ўртасида фаол музокаралар давом этмоқда ва каталонияликлар трансферни амалга оширишга оптимистик қарамоқда. Инсайдер “Барселона”да Родри масаласида ишонч жуда юқори эканини қайд этди.

Романонинг фикрича, келишувнинг чўзилаётганига асосий сабаб Родрининг “Манчестер Сити” учун алоҳида мақомга эга эканидир. Испаниялик яримҳимоячи клуб тарихидаги энг муҳим футболчилардан бирига айланган ва “Сити” унинг кетиш истагини ҳурмат қилган ҳолда, трансфердан муносиб маблағ олишни хоҳламоқда.

Канселу бўйича вазият эса янада аниқ. Португалиялик ҳимоячи “Ал-Ҳилол” билан шартномани бекор қилиш масаласини муҳокама қилмоқда. Романога кўра, Канселу фақат “Барселона”га ўтишни истамоқда. Агар Саудия клуби билан келишувга эришилса, каталонияликлар футболчи билан шартномани расмийлаштиришга тайёр. “Барселона” Канселуни яқин 48 соат ичида клубга қайтаришга умид қилмоқда.

Шу билан бирга, “ПСЖ”да Зион Сузуки трансфери кутилмаганда барбод бўлди. “Парма” дарвозабонининг Парижга ўтиши деярли ҳал бўлган, ҳатто уни олиб келиш учун хусусий самолёт ҳам тайёрланган. Бироқ футболчи томони билан агентлик комиссиялари бўйича келишмовчилик юзага келиб, музокаралар тўхтаган. Энди “Астон Вилла” Сузуки учун курашга қўшилди ва “Парма”га 30 млн евро ҳамда 5 млн евро бонус таклиф қилишга тайёр.

Романо “Манчестер Сити” ҳали ҳам “Челси” яримҳимоячиси Энцо Фернандесни олишга умид қилаётганини ҳам тасдиқлади. Футболчининг 120 млн фунтлик бандидан фойдаланиш муддати ўтгани учун энди “Сити” музокара олиб бориши керак. Инсайдер трансферни ҳали ёпилган деб ҳисобламаслик лозимлигини айтди.

Бундан ташқари, “Барселона” колумбиялик ҳужумчи Луис Суарес бўйича ҳам маълумот тўплаган. Бироқ клуб раҳбарияти 80 млн евро талаб қилинаётган трансферни амалга оширмасликка қарор қилган. Романога кўра, шартлар ўзгармаса, бу трансфер “Барселона” учун ёпилган масала ҳисобланади.