«Манчестер Сити» ҳамон «Челси» яримҳимоячиси Энцо Фернандесни ўз сафига қўшиб олишдан умидини узмаган.
«Шаҳарликлар» белгиланган муддатда, жума куни кечгача керакли суммани - тахминан 140 миллион еврони таклиф қилмадилар. Бироқ, инсайдер Фабрицио Романонинг хабар беришича, «Сити» вакиллари ҳали ҳам аргентиналик футболчи номзодидан воз кечмаган ва трансферни амалга ошириш йўлини топиш мақсадида «Челси»га қўнғироқ қилишда давом этмоқда.
Transfermarkt портали Энцо Фернандеснинг актуал трансфер нархини 100 миллион еврога баҳоламоқда.
Маълумот учун, лондонликлар яримҳимоячини 2023 йил бошида «Бенфика»дан 121 миллион еврога сотиб олган эди. 25 ёшли аргентиналик футболчининг амалдаги шартномаси 2032 йилгача мўлжалланган.
