“Вилларреал” трансферлар ойнасининг сўнгги кунларида Жорж Микаутадзени жамоада сақлаб қолиш чораларини кўрмоқда. Испания клуби гуржистонлик ҳужумчининг шартномасидаги товон пулини мавсумнинг охирги 10 кунида 60 млн евродан 75 млн еврога оширади, деб ёзмоқда “Marca”.
“Вилларреал” Микаутадзени ўтган ёзда “Лион”дан 30 млн еврога харид қилган эди. Айни пайтда 25 ёшли ҳужумчининг шартномасида 60 млн евро миқдоридаги товон пули мавжуд. Бироқ трансферлар ойнасининг сўнгги 10 кунига кирилганда бу сумма автоматик равишда 75 млн еврога кўтарилади.
Бу қарор “Вилларреал”га футболчини сақлаб қолиш учун қўшимча кафолат беради. Шунингдек, агар бошқа клублар Микаутадзега жиддий қизиқиш билдирса, испанлар музокараларда ўз манфаатларига мосроқ позицияга эга бўлади.
Ҳозирга қадар “Вилларреал” Микаутадзе бўйича расмий таклиф олмаган. Футболчининг вакиллари ҳам клуб раҳбариятига бошқа жамоалардан аниқ таклиф келгани ҳақида хабар бермаган. Сенегаллик яримҳимоячи Пап Гейе бўйича эса “Эвертон” қизиқиш билдирган, аммо бу масала музокаралар даражасигача етиб бормаган.
Шунга қарамай, “Вилларреал” раҳбарияти трансферлар ойнасининг сўнгги кунларида вазият кескин ўзгариши мумкинлигини ҳисобга олмоқда. Клубнинг спорт директорияси эҳтимолий таклифларга тайёр турибди.
Бунга ўтган мавсумдаги воқеалар ҳам асос бўла олади. Ўшанда “Вилларреал” “Кристал Пэлас”га Хереми Пинони айнан трансферлар дарчасининг сўнгги кунларида сотган ва ушбу келишувдан тушган маблағнинг бир қисми Микаутадзени харид қилишга сарфланган эди.
