Мадриднинг «Реал» клубида бош мураббий Жозе Моуринионинг иш услубидан норозилик ортидан ички таранглик кучаймоқда. The Touchline нашрининг Х ижтимоий тармоғидаги саҳифасида ёзишича, бир неча футболчи португалиялик мутахассиснинг аниқ тактик тизимга эмас, кўпроқ футболчиларнинг индивидуал маҳоратига таянаётганидан норози.
Манба маълумотига кўра, жамоа кийиниш хонасида қарашлар ўртасидаги тафовут тобора кучайиб бормоқда. «Реал» учун қандай мураббий кераклиги борасидаги фикрлар ҳам бир-бирига зид келмоқда.
Қайд этилишича, жамоанинг собиқ бош мураббийи Хаби Алонсо ҳаддан ташқари мураккаб тактик ёндашуви сабабли истеъфога чиқарилган. Эндиликда эса Моуринио тактик жиҳатдан етарлича чуқур ишламаётгани учун танқид қилинмоқда. Бу ҳолат клуб ичидаги мураббийлик ёндашувига нисбатан қарашлар турлича эканини кўрсатмоқда.
Маълумот учун, Жозе Моуринио ёзда «Реал» бош мураббийига айланган. Португалиялик мутахассиснинг клуб билан шартномаси 2029 йил ёзигача мўлжалланган.
