«Манчестер Сити» клуби яримҳимоячи Эллиот Андерсон трансфери бўйича «Ноттингҳэм Форест» билан келишувга эришилганини расман эълон қилди.
23 ёшли футболчи айни пайтда Англия миллий жамоаси сафида ЖЧ-2026да иштирок этмоқда. У Канзас шаҳрида тиббий кўрикдан муваффақиятли ўтган. Трансфер бўйича барча расмий ҳужжатлар футболчи Англияга қайтгач якунланади.
Клуб баёнотида шундай дейилади: «Манчестер Сити»дагилар Эллиот ва Англия миллий жамоасига ЖЧ-2026даги иштирокида омад тилайди ҳамда уни тез орада Манчестерда кутиб олишни интиқлик билан кутмоқда».
Эслатиб ўтамиз, Эллиот Андерсон «Нюкасл» академияси тарбияланувчиси ҳисобланади. У 2024 йилда «Ноттингҳэм Форест»га 15 миллион фунт эвазига кўчиб ўтганди.
Маълумот учун, ўтган мавсум Андерсон АПЛда 38 та учрашувда майдонга тушиб, 4 та гол ва 4 та голли узатмага муаллифлик қилган. Инсайдерлар маълумотига кўра, трансфер суммаси 135 миллион еврони ташкил этган.
