Уларнинг фаолиятида янги саҳифа ёхуд 2 нафар футболчимиз Португалиянинг «Брага» клубига кўчиб ўтди

Ўтган йили ўсмирлар ўртасида Осиё чемпионлиги қўлга киритган миллий жамоамиз аъзолари европалик агентларнинг эътиборига тушишганди. Натижада футболчиларимиз – Сайфиддин Содиқов ва Садриддин Ҳасанов Португалиянинг «Брага» клубининг жиддий қизиқишларига сабаб бўлди. Фақат ёш масаласи ўлароқ, уларни қўлга киритиш бироз кейинроққа сурилганди.

Маълумки, Сайфиддин Содиқов 2008 йилнинг 27 июнь санасида Тошкентда таваллуд топган. Қанот ярим ҳимоячиси «Одил Жуниор» академияси тарбияланувчиси саналади. Ўзбекистон U17 миллий жамоамиз билан Осиё чемпиони бўлди ва жаҳон чемпионатида қатнашди. Футболчи биринчи даврани Суперлигада «Андижон» сафида ўтказди. Илк бор ушбу клуб шарафини ҳимоя қилган ҳолда Суперлида дебютини ўтказишга муваффақ бўлди. У учта учрашувда майдонга тушди. 30 июнь куни уни «Андижон» билан тузилган ижара шартномаси якунланди.

Садриддин Ҳасанов 2008 йилнинг 21 май куни таваллуд топган. У ҳужумкор вингер. Бунгача «Бунёдкор» тарбияланувчиси сифатида клуб шарафини ҳимоя қилиб келди. Футболчи «Қалдирғочлар» билан Суперлигада 6, Кубокда 1 та ўйинда майдонга тушди. Садриддин ҳам ўсмирлар жамоамиз сафида Осиё чемпионлигига эришди ҳамда жаҳон чемпионатида қатнашиб, ўзидан илиқ таассурот қолдиришгани барчамизнинг ёдимизда. Шу сабабли йигитларимизга четдан қизиқишлар бўлди ва уларнинг орасида португалияликлар анча жиддий ва дадил ҳаракат қилдилар. Натижада футболчиларимиз қишда «Брага» клубига бориб келишди.

Унгача футболчилар Ўзбекистон чемпионатида ўйин амалиётига эга бўлган ҳолда ўйин амалиётларини янада шакллантириб турдилар.

Ниҳоят, улар кутган кун келди: бир неча кун илгари Содиқов ва Ҳасанов Португалияга йўл олишди ва «Брага» клубига қўшилишди. Tribuna.uz нашрига маълум бўлишича, футболчиларимиз ушбу клуб билан бир йиллик шартнома имзолашган. Айни пайтда «Брага» U23 жамоаси машғулотларида иштирок этишяпти.