«Барселона» вингери Рафиня Бразилия миллий жамоаси бош мураббийи Карло Анчелотти Неймарни бўлажак жаҳон чемпионати учун таркибга киритса, бундан хурсанд бўлишини айтди.
«Мен учун Неймар — Бразилияга олтинчи жаҳон чемпионлигини олиб келишга ёрдам бера оладиган футболчи. Унинг бразилия футболи учун нақадар муҳим фигура эканини тушуниш керак.
У бир пайтлар мени миллий жамоада худди умр бўйи танийдигандек қарши олган. Унинг ёрдамида мен ўзимга бўлган ишончимни оширдим ва ўз ўйинимни намойиш эта бошладим», — дея Рафинянинг сўзларини келтиради Brasil Football.
Маълумот ўрнида, 34 ёшли «Сантос» футболчиси 2023 йилдан бери миллий жамоада ўйнамаяпти. Бироқ у 2026 йилги мундиалда иштирок этишни истамоқда ва бу ҳақда бир неча бор баёнот берган.
Эслатиб ўтамиз, бразилияликлар сўнгги бор 2002 йилда жаҳон чемпионлигини қўлга киритган. Шунга қарамай, улар ҳанузгача энг кўп ғолиб бўлган жамоа сифатида рекордни сақлаб келмоқда.
Аввалроқ «Сантос» расмийлари машғулотга келмаган Неймар билан боғлана олмаётгани маълум қилинганди.
