Португалия миллий жамоаси бош мураббийи Жорже Жезуш Миллатлар лигаси доирасида Норвегияга қарши сафардаги баҳсда 41 ёшли Криштиану Роналдуни майдонга туширишни дастлаб режалаштирмаган. Бу ҳақда А Bolа хабар берди.
Мазкур баҳсда Португалия 2:1 ҳисобида ғалаба қозонган. Роналдунинг ўйинни тўлиқ захира ўриндиғида ўтказгани эса жамоа ичидаги вазиятга эътибор қаратилишига сабаб бўлди.
Португалия миллий жамоаси 1 октабр куни Миллатлар лигасида Данияга қарши баҳс ўтказиш учун Копенҳагенга келган. Шу муносабат билан Португалия футбол федерацияси президенти Педру Проэнса ҳам Данияга ташриф буюрган. Маҳаллий манбаларга кўра, Проэнса, Жезуш ва Роналду иштирокидаги уч томонлама музокаралар муваффақиятли якунланган. Томонлар ўртасидаги муҳит ижобий бўлгани ва келишмовчиликлар бартараф этилгани айтилмоқда.
Аввалроқ Жезуш Роналдуни Норвегияга қарши баҳснинг иккинчи бўлимида тахминан 30 дақиқага захирадан майдонга туширишни режалаштиргани ҳақида хабарлар тарқалганди. Ҳужумчи ўйинолди қизиш машқларида қатнашган, бироқ якунда майдонга тушмаган.
Эслатиб ўтамиз, бу Роналду учун 18 йил ичида миллий жамоанинг расмий баҳсида тўлиқ захирада қолган илк ҳолат бўлди. Якуний ҳуштакдан сўнг португалиялик ҳужумчи мухлислар билан саломлашмасдан тўғри кийиниш хонасига йўл олган.
Маълумот учун, Роналду 29 сентябр куни жамоавий машғулотда қатнашмади ва машғулотни спорт залида индивидуал тарзда ўтказди. Португалия 1 октабр куни Данияга қарши баҳсда майдонга тушиши кутилмоқда.
Мухлислар бу янгиликни Telegram’да муҳокама қилмоқда
Изоҳлар Telegram’да очилади