Франция чемпионатидаги «Нант» — «Тулуза» учрашуви 22-дақиқада тартибсизликлар сабаб тўхтатилди.
Маълумотларга кўра, ниқоб таққан бир неча ультрас мухлислар майдонга югуриб чиқиб, пиротехника воситаларидан фойдаланган.
Мухлисларнинг норозилигига клубнинг Лига 1'дан чиқиб кетгани сабаб бўлган. Улар мавсум якунида жамоа ва раҳбариятга ўз эътирозларини кескин тарзда билдиришга уринган.
Қайд этилишича, мухлислар ҳатто бош мураббий Воҳид Ҳалилҳоджич томон ҳам ташланган. 74 ёшли мутахассис уларни тинчлантиришга уринган, бироқ бунинг уддасидан чиқа олмаган.
Шундан сўнг футболчилар ва мураббийлар зудлик билан кийиниш хонасига йўл олган. Ҳалилҳоджичнинг аҳволи ҳам ёмонлашгани айтилмоқда.
Эътиборлиси, ушбу баҳс тажрибали мураббий фаолиятидаги сўнгги ўйин бўлиши керак эди.
Якунда тартибсизликлар давом этгани сабаб учрашув бекор қилинди.
