Моуринио Винисиуснинг ҳолати ҳақида гапирди

«Реал» бош мураббийи Жозе Моуринио 21 октябр, чоршанба куни UEFA Чемпионлар лигаси умумий босқичи 3-туридан ўрин олган «Лейпциг»га қарши баҳсда ҳужумчи Винисиус Жуниор асосий таркибда майдонга тушишини тасдиқлади.

Аввалроқ бразилиялик футболчи Ла Лиганинг 8-туридан ўрин олган «Вилярреал» (1:0) билан ўйинда содир этган хатти-ҳаракатлари учун 4 та учрашувга дисквалификация қилинган эди. У рақиб футболчисининг сочидан тортгани учун миллий чемпионатнинг иккита ўйинини, ҳакамга нисбатан норозилик билдиргани учун эса яна иккита баҳсни ўтказиб юборади. Натижада футболчи Ла Лиганинг 9-туридаги «Севиля»га (4:1) қарши ўйинда иштирок этмади ва 25 октябр куни «Барселона»га қарши «Эл Класико»да ҳам майдонга туша олмайди.

Чемпионлар лигаси умумий босқичининг 2-туридан ўрин олган «Рома»га қарши ўйинда Моуринио ҳисоб рақиб фойдасига 1:3 бўлиб турган пайтда Винисиусни 59-дақиқада захирага олганди. Унинг ўрнига майдонга тушган Эндрик гол урди ва «Реал» якунда 4:3 ҳисобида ғалаба қозонди.

«Мен бундай йўл тутишни ёқтирмайман, аммо вазият тақозо қилгани учун шундай қилишга мажбурман. Винисиус чоршанба куни асосий таркибда майдонга тушади. Чемпионлар лигаси ундаги мотивацияни сақлаб қолиш имкониятидир, токи у фақат машғулот ўтказиб, ўйинлармиз қолиб кетмасин.

У жисмонан тетик. Бугун ўйнамагани сабабли жисмоний тайёргарлиги устида кўп ишлади. Умид қиламанки, ҳаммаси унинг учун яхши кечади. Вини бунга лойиқ ва у бизга керак», — дея Моуринионинг сўзларини келтиради клубнинг расмий сайти.