«Бир катакка битта хўроз етади» — Лапорта «Мбаппе «Реал»ни кучайтиролмагани ҳақида

«Барселона» президенти Жоан Лапорта ҳужумчи Килиан Мбаппе «Реал»ни кучайтира олмагани ҳақида фикрларини билдирди.

Франциялик футболчи 2024 йилнинг ёзидан буён «қаймоқранглилар» сафида тўп тепмоқда. Унгача «ПСЖ» ва «Монако» клубларида ўйнаган.

«Мен бу ҳақда аввал ҳам айтганман. Бир катакда биттадан ортиқ хўроз бўлиши мумкин эмас. Бу ҳеч қачон иш бермайди! Футболда энг муҳими — жамоа ва жамоавий руҳ. Агар булар бўлмаса, лойиҳа муваффақиятсизликка учрайди.

Бу — «Барселона»нинг кучли жиҳатларидан бири. Бизнинг жамоамизда буюк иқтидорлар, «Ла Масия» тарбияланувчилари ва турли футбол маданиятига эга ўйинчилар бор. Шунга қарамай, биз ўзаро ажойиб уйғунликка эга жамоа тузишга муваффақ бўлдик.

Бундан вазиятни жамоани ривожлантириш устида ишлаётган ажойиб бош мураббий ва спорт директори яратди. «Реал» эса йирик трансферларни амалга ошириш ва юлдуз футболчиларни таркибга жалб қилишни афзал кўрди», — дея Лапортанинг сўзларини келтиради The Touchline.