Миср футбол ассоциациясининг ФИФАга йўллаган шикояти франциялик ҳакам Француа Летексенинг Жаҳон чемпионатидаги фаолиятига жиддий таъсир кўрсатиши эҳтимолдан йироқ. Бу ҳақда L'Équipe нашри хабар берди.
Аввалроқ Миср футбол ассоциацияси ЖЧ-2026 1/8 финалида Аргентинага қарши кечган баҳс (2:3) ҳакамлиги юзасидан ФИФАга расмий норозилик билдирган эди. Африка вакиллари Летексенинг айрим қарорларидан норози бўлиб, франциялик ҳакамлар бригадасини турнирдан четлатишни сўраган.
Бироқ манбага кўра, бундай шикоятнинг муваффақият қозониш эҳтимоли жуда паст. Сабаби, ҳеч бир мамлакат ФИФА ҳакамлар бригадасини тайинлаш ёки четлатиш масаласида вето ҳуқуқига эга эмас. Бу борадаги якуний қарор ФИФА Ҳакамлар қўмитаси ваколатига киради.
Шунга қарамай, Летексенинг ушбу баҳсдаги ҳакамлиги таҳлил қилинади. Қўмита унинг фаолиятини расмий ҳисоботлар, баҳсли видеолавҳалар ва ҳакамлик сифати асосида баҳолаб, турнирдаги кейинги иштироки юзасидан қарор қабул қилади.
L'Équipe қайд этишича, ҳозирча франциялик ҳакамнинг турнирни тарк этиш эҳтимоли жуда паст. Шу билан бирга, агар Франция миллий жамоаси чоракфиналга йўл олса, мамлакат манфаатлари тўқнашуви сабаб франциялик ҳакамлар — Француа Летексе ва Клеман Тюрпеннинг кейинги босқичларда ишлаш имконияти чекланиши мумкин.
Эслатиб ўтамиз, аввалги Жаҳон чемпионатларида ҳам айрим федерациялар ФИФАга шунга ўхшаш шикоятлар юборган. Бироқ шу кунгача бирор ҳакам фақат маълум бир мамлакатнинг норозилиги сабаб турнирдан четлатилмаган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади