ФИФА Ҳакамлар қўмитаси раиси Перлуижи Коллина ЖЧ-2026 1/8 финалидаги Аргентина — Миср (3:2) баҳсида VAR аралашуви ортидан бекор қилинган гол юзасидан изоҳ берди.
«Ҳар бир гол урилганидан сўнг VAR ҳужумнинг бошланиш фазасини (АПП) текширади. Агар голга олиб келган ҳужум аввалида қоидабузарлик аниқланса, VAR бош ҳакамга эпизодни мониторда қайта кўришни тавсия қилади. Бунда вақт ёки дарвозагача бўлган масофа бўйича аниқ чеклов мавжуд эмас.
Аргентина ва Миср ўртасидаги баҳсда Мисрнинг 19-рақамли футболчиси Марван Аттия Аргентинанинг 6-рақамли футболчиси Лисандро Мартинеснинг оёғини босиб юборди. Бизнинг фикримизча, бу аниқ қоида бузилиши. Агар бош ҳакам буни майдонда кўрмай қолган бўлса, VAR албатта аралашиши керак.
Рақибнинг оёғини босиш — бу қоида бузилиши. Аммо ҳимоячи аввал тўпга ўйнаб, кейин одатий футбол контакти юз берса, бу қоидабузарлик ҳисобланмайди. Баҳс охирида Мисрнинг 10-рақамли футболчиси Муҳаммад Салоҳ ва Аргентинанинг 9-рақамли ҳужумчиси Хулиан Алварес ўртасидаги вазият айнан шундай ҳолат эди. Майдондаги ҳакам ҳам, VAR ҳам буни одатий футбол контакти деб баҳолади», — дея Коллинанинг сўзларини Mundo Deportivo нашри келтирди.
Эслатиб ўтамиз, Аргентина ушбу баҳсда 0:2 ҳисобидаги ортда қолишни бартараф этиб, 3:2 ҳисобида ғалаба қозонган ва Жаҳон чемпионати чоракфиналига йўл олган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади