Мартинес: «Гуруҳда 1-ўринни олмоқчи эдик. Аммо ЖЧ осон эмас — турнир йўли ва рақибни танлаш имконсиз»

Португалия бош мураббийи Роберто Мартинес жамоасининг Жаҳон чемпионати гуруҳ босқичини иккинчи ўринда якунлаб, плей-оффга чиққанини изоҳлади.

– Сиз бир неча бор Хорватия Европа жамоаси эканини таъкидлаган эдингиз, энди эса навбатда Испания турибди. Португалия гуруҳда биринчи ўринни эгаллашни истаганди, аммо иккинчи поғона учун унчалик хафа бўлмагандек туюлди. Чунки бу орқали Аргентина ва Гана билан эртароқ тўқнаш келмасликка эришган бўлиши мумкин. Бу фикрда мантиқ борми?

– Афсуски, йўқ. Бунда ҳеч қандай мантиқ йўқ. Биз ҳар бир ўйинда ғалаба қозонишни истаймиз. Жаҳон чемпионатига келганимизда асосий мақсадимиз турнир давомида янада кучайиш ва барча футболчиларни ўйинларга тайёрлаш эди.

Барча баҳсларда ғалаба қозониб, гуруҳда биринчи ўринни эгаллашни хоҳлаганмиз. Аммо Жаҳон чемпионати осон мусобақа эмас. Бу ерда доимий равишда ривожланиш, турли вариантларни синаб кўриш ва ўйин тамойилларини такомиллаштириш талаб этилади.

Турнир йўлига келсак, бу ҳақда аввал ҳам айтганман: рақибни танлаб бўлмайди.

Энг муҳими — қайси рақиб ёки қайси йўл тўғри келишидан қатъи назар, ўзимизнинг энг яхши футболимизни намойиш этиш. Ҳозир эса бутун эътиборимизни 1/8 финал баҳсига қаратганмиз, — дея испаниялик мутахассиснинг сўзларини келтиради Record.