Италия миллий жамоаси бош мураббийи Роберто Манчини Миллатлар Лигаси доирасидаги Францияга қарши ўйиндан (1:1) сўнг жамоасининг ҳаракатларига баҳо берди.
«Натижа фикрларни ўзгартиради. Бугун жуда қийин учрашув бўлди. Доннарумма ўйин охирида зарур пайтда бизни қутқариб қолди. Лекин умумий ҳисобда биз жуда кучли жамоага қарши яхши ўйин ўтказдик.
Агар бу йигитлар ишлашда давом этса, ажойиб жамоага айланишлари мумкин. Бунинг учун маълум вақт керак бўлади, аммо биз яхши суръатда ривожланяпмиз», — деди Манчини.
Италия бош мураббийи жамоанинг сўнгги учрашувлардаги ўйинида ижобий ўзгаришларни ҳам қайд этди.
«Белгияга қарши ўйиннинг иккинчи бўлимидан бошлаб яхшироқ ҳаракат қила бошладик. Тўғри қарорлар қабул қилишга ҳаракат қилдик ва зарур бўлган пайтларда ҳимояда ҳам ишончли ўйнадик», — дея қўшимча қилди мутахассис.
