Италия футбол федерацияси (FIGC) техник директори Паоло Малдини агар ташкилот Андреа Пирлони Италия миллий жамоаси бош мураббийи этиб тайинлашга тўсқинлик қилса, истеъфога чиқиши мумкин. Бу ҳақда La Gazzetta dello Sport хабар берди.
Маълум қилинишича, Малдини FIGCдаги лавозимини фақат янги бош мураббий номзодини мустақил танлаш ҳуқуқи сақланиб қолиши шарти билан қабул қилган. Агар федерация раҳбарияти Пирло номзодини рад этса, Паоло буни ўз ваколатларининг чекланиши сифатида баҳолаб, истеъфо масаласини кўриб чиқиши мумкин.
Хабар қилинишича, Малдини аввалроқ Антонио Конте ва Роберто Манчини номзодларини рад этган. Унинг фикрича, Контенинг клубларни тез-тез алмаштириши салбий омил бўлган. Манчинининг эса 2023 йилда Италия миллий жамоасини тарк этганидан кейинги фаолияти етарлича ишончли таассурот қолдирмаган.
Хосеп Гвардиола билан музокаралар муваффақиятсиз якунланганидан сўнг, Паоло ва федерация маслаҳатчиси Леонардо 47 ёшли Андреа Пирло номзодига тўхталган. Улар Пирлони замонавий футбол концепциясига мос мутахассис деб ҳисобламоқда.
Бироқ Пирлонинг Россия букмекерлик компаниясининг глобал элчиси сифатидаги фаолияти баҳс-мунозараларга сабаб бўлмоқда ва унинг Италия миллий жамоаси бош мураббийи этиб тайинланишини қийинлаштирмоқда.
Пирло ушбу вазият юзасидан расмий баёнот билан чиққан бўлса-да, Италия футбол федерацияси президенти Жованни Малаго тайинлов жараёнини вақтинча тўхтатиб қўйган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади