«Ливерпул» собиқ бош мураббийи Арне Слот Нидерландия миллий жамоасини бошқарса, унга маълум миқдорда компенсация тўлашни давом эттиришга тайёр. Бу ҳақда De Telegraph хабар берди.
Манбага кўра, бундай қарор «Ливерпул»га шартнома муддатидан олдин бекор қилингани учун тўланиши керак бўлган компенсация харажатларини бир неча миллион еврога камайтириш имконини беради.
Слот ўтган мавсум якунида «Ливерпул»дан истеъфога чиқарилган эди. Уч йиллик шартномасининг яна бир йили қолган 47 ёшли мутахассис 10 миллион евродан ортиқ компенсация олиш ҳуқуқига эга. Агар у кейинги мавсум давомида ишсиз қолса, клуб ушбу суммани тўлиқ тўлаб бериши керак бўлади.
Арне Слот «Ливерпул»ни 2024 йил 1 июндан 2026 йилгача бошқарди. У илк мавсумидаёқ жамоани Англия чемпионига айлантирди. Бироқ иккинчи мавсумда мерсисайдликлар чемпионликни ҳимоя қила олмади ва АПЛни бешинчи ўринда якунлади.
Эслатиб ўтамиз, Роналд Куманнинг 30 июн куни лавозимини тарк этганидан сўнг Нидерландия терма жамоаси бош мураббийлиги вакант бўлиб қолган. Арне Слот ушбу лавозим учун номзодлар қисқа рўйхатидан ўрин олган. Ундан ташқари, собиқ «Манчестер Юнайтед» устози Эрик тен Ҳаг ҳам даъвогарлар сафида.
Мухлислар бу янгиликни Telegram’да муҳокама қилмоқда
Изоҳлар Telegram’да очилади