«Ливерпул» клуби «Монако» яримҳимоячиси Ламин Камарани январ ойида ўз сафига қўшиб олишни режалаштирмоқда.
Daily Mail журналисти Люис Стил маълумотларига кўра, мерсисайдликлар сенегаллик 22 ёшли футболчи билан келишувга эришган бўлиши мумкин.
Аввалроқ Камара «Челси»га ўтишга яқин турган эди. Лондонликлар «Монако» билан 55 миллион евро эвазига трансферни келишиб олган ва футболчига олти йиллик шартнома таклиф қилган. Бироқ битим ёзги трансфер ойнасининг сўнгги куни амалга ошмай қолган.
«Камаранинг номи муҳокамалардан тушмаяпти. Мен мулоқот қилган «Челси» манбалари ҳам «Ливерпул» футболчи билан келишувга эришган бўлиши мумкин, деб ҳисобламоқда», — деди Стил.
Мерсисайдликларнинг футболчига қизиқиши Доминик Собослаи ва Райан Гравенберҳнинг жароҳатлари фонида янада кучайган. Ёзги трансфер амалга ошмай қолганидан сўнг «Монако» Камаранинг трансфер қийматини 70 миллион еврогача оширди.
