«Бавария» ва Англия миллий жамоаси ҳужумчиси Ҳарри Кейн совринсиз ўтган йиллари, Мюнхен клуби билан илк титулини қўлга киритгани ҳамда келажакдаги мақсадлари ҳақида гапирди.
Футболчи 2011 йилдан 2023 йилгача «Тоттенҳэм» сафида бирор расмий совринни қўлга кирита олмаган.
«Жамоа совринларни қўлга киритмаётган бир пайтда ўзинг яхши ўйнаётганингни ва ажойиб статистика қайд этаётганингни ҳис қилиш осон эмас. Ахир майдонга айнан совринлар учун тушасан. Бу борада менинг вазиятим анча ўзига хос эди. Бунчалик узоқ вақт давомида ҳеч нарса юта олмаган бошқа футболчи бўлганми-йўқми, билмайман.
«Бавария» билан биринчи совринимни қўлга киритганимда, елкамдан катта юк тушгандек бўлди. Ҳеч бўлмаганда, интервю ва матбуот анжуманларида доим муҳокама қилинадиган ушбу мавзуга чек қўйилди.
Бу менга хотиржам бўлиш, ўзимни эркин ҳис қилиш, ортиқча ўйламаслик ва кераксиз босимдан халос бўлишга ёрдам берди.
Ҳозир фаолиятимнинг жуда яхши давридаман. Сўнгги икки йил ичида бир қанча совринларни қўлга киритдим ва олдинда яна кўплаб зафарлар кутиб туришига умид қиламан.
Фаолиятим якунига қадар 20 дан ортиқ соврин ютишни истайман. Шунда, эҳтимол, дастлабки 10 йил давомида совринсиз қолганим ҳақида камроқ гапиришар», — дея Кейннинг сўзларидан келтиради Bayern & Germany нашри.
