«Манчестер Юнайтед» бош мураббийи Майкл Кэррик АПЛ 1-турида «Ҳалл Сити»га қарши баҳсдаги 0:2 ҳисобидаги мағлубиятдан сўнг жамоани етарлича ҳаракат қилмагани ёки иштиёқ кўрсатмагани учун танқид қилиш нотўғри эканини айтди.
Бруну Фернандеш ва Юри Тилеманснинг етакчилик фазилатлари ҳақида:
«Бу бор-йўғи битта баҳс. Менимча, кийиниш хонамизда бутун мавсум давомида етарлича етакчилик бор. Оддий мағлубият сабабни етакчиликдан излаш кераклигини англатмайди. Баҳсдан кейин менга «иштиёқ етишмади», дейишди. Гап фақат бунда эмас. Агар биз каби иккита стандарт вазиятдан гол ўтказиб юборсангиз, бу ўйиннинг боришига таъсир қилади».
Жамоанинг бундай ўйин кўрсатиш сабаблари ҳақида:
«Сиз футболни узоқ вақтдан бери кузатасиз, тўғрими? Жамоалар ютади ва ютқазади. Гап фақат ҳаракат қилган ёки қилмаганликда эмас. Бунга кўплаб сабаблар таъсир қилиши мумкин. Мен барча сабабларни тушунтириб беришим шарт эмас, чунки биз ниманинг устида ишлаётганимизни биламиз.
Жамоа мағлуб бўлса, ҳамма нарса нотўғри, деб айтиш жуда осон: бу нотўғри, у нотўғри, ҳаракат етарли эмас, иштиёқ етишмайди. Бу энг оддий жавоб. Аммо футбол баҳсида натижага кўплаб омиллар салбий таъсир қилиши мумкин.
Эҳтимол, биз бундан олдин ҳам шундай ўйнаб, 1:0 ҳисобида ғалаба қозонганмиз ва ҳамма «қандай ажойиб жамоа, қандай ажойиб мураббий, қандай ажойиб футболчилар», деган. Шунинг учун, менинг фикримча, вазиятни таҳлил қилганда, бунинг акси ҳам доим тўғри бўлавермайди. Биз чуқурроқ ўйлаб, тафсилотларни таҳлил қилишимиз керак. Ғалабалардан ҳам ортиқча қувонмаслигимиз лозим, чунки ҳаммаси ҳам мукаммал бўлмаганини биламиз», — деди Кэррик.
Маълумот учун, «Манчестер Юнайтед» АПЛнинг 2-турида бугун «Ипсвич»ни қабул қилади. Баҳс бугун, 30 август куни Тошкент вақти билан 20:30 да бошланади.
