Камолиддин Тожиев: «Ўйинни қийин бўлишини билардик»

Бугун Суперлиганинг 15-турига старт берилди. Марказий тўқнашув мақомидаги «Андижон» ҳамда «Пахтакор» ўртасидаги шиддатли баҳсда ҳисоб очилмади.

Дуранг натижа билан якунланган учрашувдан сўнг «Пахтакор» устози Камолиддин Тожиев матбуот анжуманида қатнашди.

- Ўйинни қийин бўлишини билардик. Йигитларга тушунтиргандик. Футболчилар ўз савиясида ўйин кўрсатишди. Бутун баҳс давомида яхши ўйин кўрсатдик. Гол урдик, ҳисобланмади. Ғалаба қозонишга беришмади, «Андижон» жамоаси эмас, бунақа ўйнаш қийин.

- «Андижон» жамоаси эмас, деб айтиб ўтдингиз. Тўлиқроқ изоҳ бера оласизми?

- Ўзлари билишади, кўрганлар ҳам билишади. «Андижон» яхши жамоа. Лекин бугун биз очко йўқотдик. Бизга ҳар бир очко жуда муҳим.

- Матбуот анжуманларида доимо ўйинчилар тўғрисида тўлиқ маълумот бериб келгансиз. Рустам Турдимуродовни «Андижон»га ўтиши қанчалик ҳақиқат?

- Билмайман, бу ҳақида эшитмаганман. Бу гап қаердан чиқди, билмайман!

- Қайдномадан ўрин олишмаган Хожимат Эркинов ва Ҳожиакбар Алижоновда жароҳат бормиди?

- Ҳожимат шу ерда эди, тиклана олмади. Кичик жароҳати бор. Алижоновда ҳам бироз жароҳат бор.

- Қизил карточка кўрсатилган вазиятга изоҳ бера оласизми?

- Кўриб чиқишимиз керак. Кўрмасдан туриб гапира олмаймиз. Кўрганимиздан кейин айтса бўлади.

- «Пахтакор» чемпионлик учун курашяпти. Бугунги дуранг жамоангизни чемпионлик йўлидаги имкониятларига қанчалик таъсир қилади?

- Ҳали чемпионатни ярми олдинда. Олдинда иккинчи давра турибди, кўп ўйинлар бор. Ҳозир ҳамма очко йўқотяпти. Барча жамоалар кучли, енгил бўлмайди. Барибир биз охиригача курашамиз. Олдимизда мақсадимиз бор. Фақат кейинги ўйинларни ютишга ҳаракат қиламиз», - дея Тожиевнинг сўзларидан келтиради Tribuna.uz мухбири.