«Уч хил «Реал»ни кўрдим» — Моуринио «Фиорентина» билан ўйиндан сўнг интервю берди

«Реал» бош мураббийи Жозе Моуринио «Фиорентина» (2:2) билан ўртоқлик ўйинидан сўнг ўз фикрларини билдирди.

— Жамоанинг ўйини ҳақида фикрларингиз?

— «Реал»ни уч хил ҳолатда кўрдим: жуда кучга тўлган, чарчаган ва жуда чарчаган ҳолатда. Тетик жамоа жуда яхши ўйнади. Биринчи бўлимдан кейинги 2:1 ҳисоби жуда кичик эди — дастлабки 45 дақиқани жуда юқори даражада ўтказдик ва осонликча танаффусга 3:0 ёки 4:0 ҳисобида чиқишимиз мумкин эди.

Кейин ўйин анча жисмоний курашга айланди, рақиб босим ўтказа бошлади ва жамоанинг иккинчи қиёфаси намоён бўлди. Хоан Мартинес ва Марио Ривас каби икки ёш футболчи билан ўз жарима майдонингда ўйнаш… Улар ажойиб ўйин ўтказишди, аммо ҳозирча Мойзе Кен каби «монстр»га қарши туриш учун жисмонан тайёр эмаслар.

Жамоанинг учинчи қиёфаси эса — менга жуда ёққан ҳолат — қаттиқ чарчаган бўлса ҳам, жамоа бўлиб ҳаракат қилишди ва яна ўйин назоратини қўлга олишди. Думфрис ва Эндрик атиги уч кун машғулот ўтказишганди, аммо 70 дақиқадан кўпроқ ўйнашди. Бу мен учун катта аҳамиятга эга. Уларга миннатдорчилик билдирдим. Менга ҳаммаси ёқди.

— Ўйиндан кейин қандай хулосаларга келдингиз?

— Бу — бор имкониятдаги футболчилар билан майдонга чиққан «Реал». Ўйиндан олдин йигитларга айтдим: «Реал» ўртоқлик баҳси бўлса ҳам, барибир «Реал»лигича қолади. Бугун мен қўлимда бўлган футболчиларни майдонга туширишим керак эди. Фақат кеча бирга машғулот ўтказдик, унда ўйинни ташкиллаштириш устида бироз ишладик.

Ёш йигитлар — Хоан ва Марио фантастик келажакка эга. Ўйин кучли курашга айлангунча, улар ажойиб кўринишди ва қойилмақом даражада маҳоратларини намойиш этишди. Биринчи жамоанинг мавжуд бўлган 7 футболчисидан 2 нафари атиги учта машғулот ўтказишганди. Кейин эса биз бечора Карлос Эспини майдонга туширдик. У кеча атиги бир соатча машқ қилди, бугун эса бизга ёрдам берди ва «Реал» нима эканини ҳис қилиш имкониятига эга бўлди.

Биринчи кундан бошлаб йигитларнинг ишидан жуда мамнунман. Қолган футболчиларнинг йўқлиги мени хавотирга солмоқда, улар билан уч ҳафта тўлиқ тайёргарлик ўтказишни истардим, аммо бунинг иложи йўқ. Душанба куни Винисиус, Браҳим ва Бернарду Силва қўшилади. Думфрис, Карлос ва Эндрикнинг машғулот кунлари кўпаяди… Қолганлар келгунига қадар шу тарзда давом этади.

— «Реал»ни яна бошқарганингизда нималарни ҳис қилдингиз?

— Ҳозирча ҳеч нарса. Ҳақиқий ўйинлар ҳали олдинда, — деди португалиялик мутахассис AS билан интервюда.