Кабо-Верде миллий жамоаси дарвозабони Возиня 2026 йилги Жаҳон чемпионати доирасидаги Испанияга қарши ўйиндан кейин 2 миллионга яқин обуначига эга бўлди.
Мундиалнинг 1-тур гуруҳ босқичидаги беллашув 0:0 ҳисобида якунланди. 40 ёшли Возиня 7 та сэйв амалга ошириб, баҳснинг энг яхши футболчиси деб топилди.
Возинянинг Instagram саҳифасида обуначилар сони деярли 2 миллионга етди. Ўйин бошланишидан олдин эса унинг саҳифасига атиги 56 минг киши аъзо эди.
Баҳсдан кейинги интервю чоғида журналист Возиняга унинг ижтимоий тармоқдаги обуначилари сонини кўрсатди. Португалиянинг иккинчи дивизионидаги «Чавес» клубида тўп тепаётган дарвозабон эса аввал бу рақамга ишонмади, ҳайратланди ва кейин табассум билан: «Ақл бовар қилмас даражада», деди.
Таъкидлаш керакки, Кабо-Верде аҳолиси тахминан 530 минг нафарни ташкил этади.
