«Тушундимки, ҳамон аҳмоқман» — Клопп Нагелсманндан узр сўради

«Ливерпул» собиқ бош мураббийи Юрген Клопп Германия миллий жамоаси устози Юлиан Нагелсманндан узр сўради.

Аввалроқ Клопп ва Томас Мюллер 2026 йилги Жаҳон чемпионатида эксперт сифатида ишлаётган бир пайтда немислар бош мураббийига Жамол Мусиалани асосий таркибдан олиб, унинг ўрнига Дениз Ундавни туширишни таклиф қилишганди. Юрген, шунингдек: «Яхшиямки, ҳали ҳам таркибни Юлиан Нагелсманн танлаяпти», — деб ҳазиломуз изоҳ берганди.

Нагелсманн бу сўзларга шундай муносабат билдирган: «Юрген ва Томас футболда катта муваффақиятларга эришган. Улар истаган фикрини билдириш ҳуқуқига эга».

Германиянинг Кюрасао устидан 7:1 ҳисобидаги ғалабасидан кейин Нагелсманн майдон четида интервю бераётган вақтда Клопп ундан узр сўради.

«Айтишим керак бўлган яна бир гап бор, бунинг учун вақт топишимиз керак. Биз ҳам норасмий тарзда жамоанинг бир қисмимиз ва тўлиқ сен томондамиз.

Мен йилнинг энг ёмон жумласини ишлатдим: «ҳали ҳам». Шу сўзни ишлатганим учун ўзимга зарба беришим мумкин эди, аммо жуда кеч бўлганди ва мен телевидениеда эдим. Бу шунчаки беэътиборлик билан оғзимдан чиқиб кетди ва ишга мутлақо алоқаси йўқ.

Шуни тушундимки, икки кундан кейин 59 ёшга тўламан ва ҳали ҳам аҳмоқман. Сен нима қилсанг ҳам, биз тўлиқ сен томондамиз. Жараёнга халақит берадиган ҳеч қандай иш қилмаймиз», — деди Клопп.

Таъкидланишича, шундан сўнг Нагелсманн кулиб юборган ва интервью якунида Клопп ҳамда Мюллер билан қўл бериб кўришган.