Испания миллий жамоаси бош мураббийи Луис де ла Фуенте Жаҳон чемпионати олдидан фаворит мақоми ҳақида фикр билдирди.
Мутахассиснинг таъкидлашича, фаворит сифатида кўрсатилиш жамоага ҳеч қандай устунлик бермайди.
«Йўқ, албатта йўқ. Фаворит бўлиш нимани англатади? Бу шунчаки четдан айтилаётган фикрлар.
Агар самимий гапирадиган бўлсам, биз Франция, Бразилия ёки Аргентина миллий жамоаларидан кўра кўпроқ ғолибликка даъвогармизми?» — деди де ла Фуенте.
Мураббий Испаниянинг Европа чемпиони эканини эслатиб ўтар экан, мундиалнинг ўзига хос жиҳатларига ҳам тўхталди.
«Албатта, биз Европа чемпионимиз. Аммо амалдаги жаҳон чемпиони — Аргентина. Евро финалида биз Англияни мағлуб этгандик, бироқ ҳар қандай жамоа финалда ғалаба қозониши мумкин.
Шу сабабли фаворитлар қаторига Англия ва Нидерландияни ҳам қўшиш мумкин», — дея таъкидлади мутахассис.
Де ла Фуентенинг фикрича, ЖЧ-2026да камида 8-10 та жамоа бош соврин учун кураш олиб боради.
«Турнирда жуда кўп кучли жамоалар бор. Португалия, Африка миллий жамоалари ва бошқа терма жамоалар ҳам ғолибликка даъвогарлик қилмоқда.
Испаниями? Албатта. Лекин бу биз албатта ғалаба қозонамиз дегани эмас. Баъзан рақибдан кучлироқ бўлсангиз ҳам мағлуб бўлишингиз мумкин.
Биз ўз кучимизни ҳис қиламиз ва турнирда ғолиб чиқишга қодир эканимизни биламиз. Фаворит бўлиш яхши, аммо футболда ҳар қандай натижа юз бериши мумкин», — деди Испания бош мураббийи.
Маълумот учун, Испания миллий жамоаси ЖЧ-2026 гуруҳ босқичида Кабо-Верде, Уругвай ва Саудия Арабистонига қарши баҳс олиб боради.
