Ислом Аҳмедов: «Футболчиларимиз тарихда қоладилар»

Яна бир неча соатлардан сўнг Ўзбекистон миллий жамоамиз жаҳон чемпионатидаги дастлабки ўйинида Колумбияга қарши майдонга тушади. Бутун миллат, бутун халқ ушбу тарихий учрашувни катта ҳаяжон, иштиёқ билан кутмоқда. Ҳамма дуода, ҳамма қўллаб-қувватламоқда.

Ўзбек футболи жамоатчилиги ҳам бош жамоамизнинг тарихий ўйин остонасидаги фикр ва мулоҳазаларини билдиришда давом этмоқдалар.

Жумладан, «Андижон» устози Ислом Аҳмедов бу борада қуйидаги фикрлари билан ўртоқлашди.

- Миллий жамоамизнинг тарихда илк бор мундиалда иштирок этиши ҳақида

- Миллий жамоамиз тарихда биринчи марта жаҳон чемпионатида иштирок этяпти. Бу ўз-ўзидан футболчиларимизни қаҳрамонлигидир. Улар тарихда қоладилар ва шу нарса уларга насиб қилди. Миллий жамоамизни мундиалда иштирок этиши катта ютуқ, бу қаҳрамонлик.

- Ўртоқлик ўйинларида Каннаваро имзоси кўриндими?

- Бош мураббийимиз италиялик. Италия футболи тарихини кўрадиган бўлсак, эскитдан уларда ҳимоявий ўйин яхши шаклланган. Ўртоқлик учрашувларида қаердадир шу нарса кўринди. Чунки футболчиларимиз яхши ва тўғри ҳимояланишяпти.

Гуруҳдан чиқиш имкониятимиз тўғрисида

- Гуруҳимизга келсак, ўзбекистонлик сифатида, Ватанпарварлик ҳолатида айтишим мумкинки, албатта кейинги босқичга чиқишини жуда ҳам ҳохлаймиз. Бунга футболчиларимизни салоҳияти етарлича. Яъни, қўлидан келади. Борини бериб, охиригача ҳаракат қилишса, гуруҳдан чиқишга имкониятимиз бўлади.

- Миллий жамоамизнинг жаҳон чемпионатида қатнашиши ўсиб келаётган ёшларга қандай мотивация беради?

- Жаҳон чемпионатига чиққанимиздан кейинги ўзгаришлар шуни кўрсатяптики, ўз-ўзидан футбол тўгарагига болаларнинг келиши кескин кўпайди. Профессионал футбол фаолиятини бошлаётган ёшларимиз ҳам ўз кўзлари билан кўришяптики, уларга яратиб берилаётган шароитлар, тақдирланишлар, муҳтарам Юртбошимиз тарафидан берилаётган эътиборни кўраётган ҳар қандай ўйинчи ўз-ўзидан шу даражага чиқишни орзу қилишади. Шундай экан, бу уларга катта мотивация.

- Мундиалда фаворитлар кимлар?

- Яққол фаворит деб аниқ бир миллий жамоани кўрсатиш қийин. Дунёда футбол тезлик билан ривожланиб боряпти. Ҳозирги мураббийлар замонавий футбол талабларини тўлиқ бажаришяпти. Шунинг учун бирортасини яққол фаворит сифатида ажратиш қийин. Жамоалар таркибларини қарасангиз ҳам ҳатто баъзи етакчи футболчилар ўз миллий жамоаси таркибидан тушиб қоляптилар. Мураббийларнинг ишлари кўпроқ жамоавий ҳаракатларга йўналтирилмоқда.