«Динамо» - «Андижон» (1:1) учрашувидан кейинги матбуот анжуманида меҳмонлар устози Ислом Аҳмедов қатнашди.
- Бугунги ўйинда очко олганимиздан хурсандмиз, очиғи. Сабаби, биринчи тайм жуда оғир кечди. Йигитларимиз уч-тўрт кун олдин Кубок доирасидаги ўйинда майдонга тушиб, кўп куч йўқотишганди. Тикланиш жараёнида кўплаб футболчиларимизда тетиклик етишмади.
Бундан ташқари, хоҳлайсизми-йўқми, иккала жамоа ҳам турнир жадвалида бир хил ўринда турибмиз. Яъни, ҳар икки жамоа учун ҳам уч очко жуда зарур эди. Шунинг учун футболчиларимиз биринчи таймда эҳтиёткорлик билан ўйнашга ҳаракат қилишди. Очиғини айтсам, бу унчалик ўхшамади. Биринчи таймда ўйинимизнинг кўп жиҳатларида устунликни бой бердик.
Иккинчи таймда эса футболчилар ўзларига келишди, ўйинни ўз қўлларига олишди. Тўп назоратини бошлаганимиздан кейин ҳужумларимиз ҳам юзага кела бошлади.
- Бугун иккала жамоада ҳам гўёки мотивация йўқдек туюлди. «Динамо»нинг бундай ўйнаганидан ҳайрон бўлмадим, чунки улар учун мавсумда бирор натижага эришиш имконияти деярли қолмаган. Лекин «Андижон»да Кубок ярим финалига чиқиш орқали яхшигина мотивация пайдо бўлганди. Шунга қарамай, жамоа гўёки Кубок ярим финалига чиққан жамоадек ўйнамади. Балки чемпионатда қуйи ўринларга тушиб кетмаяпмиз, юқорига ҳам кўтарила олмаяпмиз, деган кайфият бордир?
- Йўқ, ундай эмас. Айтганимиздек, футболчиларимизда чарчоқ сезилди. Шу сабабли уларда тетиклик етишмади ва керакли ҳаракатлар яхши чиқмади. Бундан ташқари, ҳар икки жамоа учун ҳам уч очко зарур эди. Яъни, қизил зонага тушиб кетмаслик учун очколар жуда муҳим. Шу сабабли биринчи таймда эҳтиёткорлик билан ўйнаганимиз сабабли ўйинимиз унчалик ўхшамади.
- Абрамов ўйин унга ёқмаганини айтди. Сизга-чи, бугунги учрашув ёқдими
- Умумий оладиган бўлсак, бугунги ўйинда бир очко олдик. Биринчи таймда, очиғи, ўз жамоамизнинг ўйини ёқмади. Биринчи бўлимдаги ҳаракатларимиздан кўнглим тўлмади. Лекин иккинчи таймда кўнглим тўлди. Гол ўтказиб юборган бўлсак ҳам, гол уриш учун ўзимизда куч топа олдик. Шунинг учун иккинчи таймдан кўнглим тўлди, десам бўлади.
- Буни қандай изоҳлайсиз? Балки футболчиларга алоҳида кўрсатмалар бергандирсиз? Абрамов гол ўтказиб юборишни индивидуал хатолар билан изоҳлади. Умуман, ҳимоядаги ўйинни қандай баҳолайсиз?
- Йигитлар ҳаракат қилишди. Бунинг учун уларга раҳмат айтаман.
- Демак, сўнгги дақиқаларда характер кўрсатишдими?
- Ҳа. Бу — характер. Улар ҳақиқий характер кўрсатишди.
- Кубокда сиз футболчиларни алмаштиришга мажбур бўлганингизни айтдингиз. Мотивация ҳақида ҳам сўралди. Лекин бир нечта етакчи футболчидан фойдалана олмаганингиз, «Динамо»да ҳам шундай вазият бўлганини ҳисобга олсак, футболчиларнинг функционал ҳолатини қандай баҳолайсиз? Айниқса, асосий футболчилар йўқлиги сабабли майдонга туширишга мажбур бўлган ёш футболчиларнинг ҳолати қандай?
- Кўп футболчиларни алмаштиришга мажбур бўляпмиз. Жароҳатлар кўпайиб кетди, шунинг ҳисобидан таркибда ўзгаришлар қилишга тўғри келяпти. Лекин, мана, ёшларга имконият беряпмиз. Улар ўзларини кўрсатишяпти, ўйинни кучайтиришга ёрдам беришяпти. Менимча, ёш футболчиларимиз ёмон томондан ўзларини кўрсатаётгани йўқ.
- Кейинги турларда «Навбаҳор», кейин «Локомотив» билан ўйинлар бор. Қандай натижалар кутяпмиз? Тайёргарлик жараёни қандай кечади?
- Биз рақиб қандай жамоа бўлишидан қатъи назар, ўз ўйин услубимиздан чиқмаган ҳолда ҳар бир учрашувга тайёргарлик кўрамиз. Ҳужумкор футбол, тўпни назорат қилиш ва бошқа жиҳатларга эътибор қаратамиз. Барибир, барча жамоаларга қарши ўйнашимиз керак. Рақиб ким бўлишидан қатъи назар, ўз фалсафамиздан четга чиқмаган ҳолда тайёргарлик кўрамиз.
- Мавсум бошида «Андижон» катта харажатлар қилди ва номдор мураббийни олиб келди. Лекин ишлар ўхшамаганидан кейин клуб тизимида ҳам яхши мураббий борлигига гувоҳ бўлдик. Жаҳон чемпионатигача бўлган ўйинларга қарайдиган бўлсак, «Андижон»нинг энг яхши даври ўша вақтга тўғри келди. Кейинчалик эса бироз пасайиш кузатилди. Сиз икки марта истеъфо сўраганингизни ҳам айтгандингиз. Тўғриси, бунга ҳайрон қолдим. Ҳозир эса Кубокни ютиш имконияти пайдо бўлди. Агар финалга чиқилса, «Андижон» аввал ҳам мағлуб этган рақиб билан ўйнаши мумкин. Буни ўзингиз учун қўшимча мотивация деб ҳисоблайсизми? Яъни, мураббий сифатида Кубокни ютиш ўзингизни кўрсатиш учун яхши имконият эмасми?
- Албатта. Ҳар бир ўйин — мотивация, ҳар бир ўйин — синов, ҳар бир ўйин — янги тажриба. Айтганимиздек, ҳар бир кунимиз тажриба бўляпти. Бу ерда ўтказаётган ҳар бир вақтимизда ниманидир ўрганяпмиз, хатоларни тўғрилашга ҳаракат қиляпмиз.
Ўйлайманки, Худо хоҳласа, кейинги йилларда янада яхшиланиб борамиз. Нафақат ўз тажрибамизни, балки иш фаолиятимизни ҳам такомиллаштириб борамиз», - дея Аҳмедовнинг сўзларини келтиради Tribuna.uz мухбири.
