Ўзбекистон Суперлигасининг «Қизилқум» ва «Локомотив» жамоалари ўртасидаги баҳс 1:1 ҳисобида якунланди. Беллашувдан кейин меҳмонлар бош мураббийи Мирко Еличич матбуот анжуманида ўйин ҳақида фикр билдирди.
«Ёқимсиз ва оғир ўйин бўлди. Бундай жамоаларга қарши ўйнашга кўникиб қолдик. Футболдаги барча услубларни ўрганиб чиқиш керак. Биз ўзимиз истаган футболни кўрсата олмадик. Биринчи бўлимда ўз даражамизни намойиш эта олмадик. Балки бу кайфият билан боғлиқдир. Рақиб эса ўйинни жуда яхши бошлади. Голдан кейин тезликни оширди.
Баҳсда вазиятлар кўп бўлмади, чунки жамоалар ҳудудларни ёпишди. Рақибнинг қарши ҳужумларидан кейин гол ўтказиб юборишимиз ҳам мумкин эди. Бу ўйинни таҳлил қилиб чиқамиз. Барча баҳслар қийин ўтмоқда, чунки жамоалар ўз ўринлари учун курашмоқда ва олдига қўйилган вазифаларни бажаришга ҳаракат қилмоқда», — деди мураббий.
Еличичдан «Қизилқум»нинг ўйин услуби кутилган-кутилмагани ва рақиб ҳимоясини ёриб ўтиш учун қандай режалар тузилгани ҳам сўралди.
«Уларнинг «Нефтчи»га қарши ўйинини томоша қилгандим. «Қизилқум» тезлик эвазига жуда мослашувчан жамоа. Уларга қарши мутлақо бошқача футбол кўрсатишимиз кераклигини билардик.
Бугун майдон ўрилмагани бизга бироз халақит қилди, чунки тўп жуда секин ҳаракатланди. Бу атайлаб қилинганми, билмадим. Балки бунга ҳам эътибор қаратиш керакдир. Агар Суперлига даражасини оширишга ҳаракат қилаётган бўлсак, бундай деталларга ҳам қарашимиз лозим. Бу каби ҳолатлар футболнинг ривожланишига ёрдам бермайди. Биз тўпни тезроқ ҳаракатлантириб, тезкор футбол намойиш этмоқчи эдик, аммо майдон бунга қаршилик қилди», — дея қўшимча қилди Еличич.
Маълумот учун. «Қизилқум» ва «Локомотив» ўртасидаги баҳс 1:1 ҳисобида якунланган.
