«Интер» «Болоня» марказий ҳимоячиси Жон Лукумига қизиқиш билдирмоқда. Бу ҳақда Football Italia хабар берди.
Манбага кўра, аввалроқ футболчига «Ювентус», «Бешиктош» ва «Борнмут» ҳам қизиқиш билдирган бўлса, эндиликда «Интер» ҳам унинг трансфери имкониятларини ўрганишни бошлаган.
Франческо Ачерби ва Стефан де Врейнинг клубни тарк этганидан сўнг, миланликлар тажрибали марказий ҳимоячи изламоқда. Қайд этилишича, журналист Алфредо Педулла маълумотига кўра, «Интер» аллақачон футболчи вакиллари билан боғланиб, эҳтимолий трансфер шартларини муҳокама қилган.
28 ёшли колумбияликнинг «Болоня» билан шартномаси 2027 йилнинг ёзига қадар амал қилади. Бироқ клуб футболчини 28 миллион евролик товон пулидан арзон нархда қўйиб юборишни режалаштирмаяпти.
Эслатиб ўтамиз, Жон Лукуми 2022 йилда Белгиянинг «Генк» клубидан 8 миллион евро эвазига «Болоня» сафига келиб қўшилган. У шу вақтгача А Серияда 123 та баҳсда майдонга тушган.
Шунингдек, қайд этилишича, Лукумининг 28 миллион евролик нархи «Интер» қизиқаётган яна бир ҳимоячи — Трево Чалоба учун «Челси» талаб қилаётган 35 миллион евродан арзонроқ ҳисобланади.
