«Челси» Португалиянинг «Спортинг» клубидан Жеовани Кенда трансферини расман эълон қилди. Бу ҳақда Лондон клуби расмий сайти хабар берди.
19 ёшли вингер билан 2034 йилгача мўлжалланган узоқ муддатли шартнома имзоланди.
«Бу ерда бўлиш ажойиб. «Челси» — буюк клуб ва «Стемфорд Бриж»да ўйнашдан жуда хурсандман. Клуб менга ўхшаган ёш футболчиларга ишонч билдирмоқда. Мен бу жамоанинг бир қисми бўлганимдан фахрланаман», — деди Кенда «Челси» матбуот хизматига.
Эслатиб ўтамиз, «Челси» ва «Спортинг» Жеовани Кенда трансфери бўйича ёзги трансфер ойнаси очилишидан бир неча ой аввал келишувга эришганди. ОАВ маълумотларига кўра, трансфер суммаси 50 миллион еврони ташкил этган.
