Аргентина миллий жамоаси дарвозабони Эмилиано Мартинес ЖЧ-2026 финалидаги мағлубиятдан сўнг миллий жамоадаги фаолиятини якунлаши мумкинлигига ишора қилди.
Эслатиб ўтамиз, Аргентина мундиал финалида Испанияга қўшимча бўлимларда 0:1 ҳисобида имкониятни бой бериб, жаҳон чемпионлиги унвонини ҳимоя қила олмади.
33 ёшли «Астон Вилла» посбони Instagram саҳифасида ҳиссиётларга бой мурожаат эълон қилди.
«Биз яна жаҳон чемпиони бўлишни орзу қилгандим. Кубокни яна Аргентинага олиб боришни ва тарихга яна бир бор киришни хоҳлагандим.
Бу оғриқни сўз билан ифодалаш қийин. Энди кўп нарсани ўйлаб кўриш, вақт ўтаётганини англаш ва балки четга чиқиш вақти келмаганмикан, деган саволни ўзимга бериш қолмоқда.
Мамлакатим ва жамоадошларимга ёрдам бериш учун қўлимдан келган барча ишни қилдим. Афсусдаман», - деб ёзди дарвозабон.
Қайд этиш жоиз, Эмилиано Мартинес 2022 йилги Жаҳон чемпионатида Аргентинанинг чемпион бўлишида ҳал қилувчи рол ўйнаган ва мусобақанинг энг яхши дарвозабони деб топилганди. Ҳозирча унинг миллий жамоадаги келажаги борасида расмий қарор эълон қилинмаган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади