Деку: «Алварес трансфери ўтмишда қолди. Бу — футбол. Энди у ўз клубига ёрдам берсин»

«Барселона» спорт директори Деку «Атлетико» ҳужумчиси Хулиан Алвареснинг амалга ошмай қолган трансфери ҳақида фикр билдирди.

«Хулиан билан боғлиқ воқеанинг Рафиня билан боғлиқ вазиятга ҳеч қандай алоқаси йўқ. Бу мавсумда мен учун шахсан алоҳида ўринга эга бўлган «тўққизлик» — энг яхши «тўққизлик» Роберт Левандовски клубдан кетди. Роберт «Барселона» учун борини берди, биз совринларни қўлга киритдик, аммо ўзгаришлар вақти келди ва бу унга ҳам керак эди.

Биз ҳар доим шериклари билан ўзаро яхши ҳамкорлик қила оладиган, мобил (ҳаракатчан) ҳужумчини сотиб олишни мақсад қилганмиз. Хулиан шундай вариантлардан бири эди. Аммо бу трансферни амалга ошира олмадик: таклиф бердик, клуб эса уни сотмаслигини доимо таъкидлаб келди. Шунинг учун бошқа ечимларни излашимизга тўғри келди.

Габриэл Жезус режаларимизга кирмаган эди, чунки унинг келажаги қандай бўлишини билмасдик. У шартномасини узайтириши мумкинлиги ҳақида кўп гап-сўзлар бўлган. Хулианнинг трансфери амалга ошмаслигига ишонч ҳосил қилганимиздан сўнг бошқа вариантларни излай бошладик ва Габриэл биз учун идеал ечим бўлиб чиқди.

Шу тариқа ғоя ўзгармади: биз худди шундай профилга эга футболчини топишни хоҳлагандик. Аммо Хулиан энди ўтмишда қолди, биз олдинга қарашимиз керак. Қолган барча ишлардан мамнунмиз. Унинг ҳам ишлари яхши кетишига умид қиламан, ўз клубига ёрдам берсин. Ахир, бу — футбол. Унда музокаралар ва амалга ошмай қоладиган трансферлар жуда кўп бўлади», — дея Декунинг сўзларини келтиради AS.