«Тоттенҳэм» бош мураббийи Роберто де Зерби АПЛнинг 9-турида «Кристал Пэлас» устидан қозонилган 2:0 ҳисобидаги ғалабадан сўнг ўз фикрлари билан ўртоқлашди.
«Рақиб учрашувнинг катта қисмини камчиликда ўтказганига қарамай, бу оғир ўйин бўлди. «Кристал Пэлас»нинг ҳимояланиш услуби жуда мураккаб — нафақат биз, балки ҳар қандай жамоа учун ҳам.
Ҳозир ўйин тамойилларимиз ва футбол сифатини яхшилаш устида фаол ишлаяпмиз. Майдонда бўшлиқлар кам бўлган шароитда ҳаракат қилиш доимо қийин.
Тўпни бундай тезликда узатиш осон эмас, аммо йигитлар аъло даражада ўйнашди. Улар етуклик, диққат-эътибор ва майдонда нима қилиш кераклигини аниқ тушунишларини намоён этишди. Кўпроқ гол уришимиз мумкин эди, аммо умуман олганда, бу ажойиб ўйин бўлди.
Футболчиларимиз бугун энг яхши намойиш этган жиҳат — тўпни йўқотгандан кейинги реакцияси бўлди. Улар худди йиртқичлардек тўп учун курашга ташланишди. Бу жуда муҳим эди.
Рақиб майдонида ўйинни назорат қилдик — бунда сон жиҳатдан устунлигимиз ҳам катта аҳамият касб этди. Шу билан бирга, ўтиш фазаларидаги ажойиб ҳаракатларимизни ҳам алоҳида таъкидлаш лозим.
Бугун жамоа ўзини энг яхши томондан кўрсатиб, ҳақиқий етукликни намойиш этди. Футболчилар тўп билан қандай муомала қилиш кераклигини билишди.
Асоссиз таваккал қилмаслик ва рақибнинг қарши ҳужумларига йўл қўймаслик: ҳатто бир киши кўп бўлиб ўйнаётганимизда ҳам бу жиҳатларга эътибор қаратдик», — дея де Зербининг сўзларини келтиради «Тоттенҳэм» клубининг расмий сайти.
Қайд этиш лозим, «Кристал Пэлас» ҳужумчиси Жан-Филипп Матета 13-дақиқада майдондан четлатилганидан сўнг жамоа учрашувнинг катта қисмини бир киши кам бўлиб ўтказди.
Маълумот ўрнида, «тақачилар» айни вақтда АПЛ турнир жадвалида 12 очко билан 8-ўринни эгаллаб турибди.
