Ҳайме Мунгия кеча, 31 октябр куни Саудия Арабистонининг Риёд шаҳрида бўлиб ўтган жангда Никита Зонни ҳакамларнинг якдил қарори билан мағлуб этиб, WBA камарини сақлаб қолди.
Уч ҳакам ҳам ғалабани мексикалик боксчига берди — 116:112, 117:111 ва 117:111. Жангдан кейин DAZN PPV эфирида ўтказилган интервюда Мунгия ўз иштирокини 10 баллик тизимда 6–7 баллга баҳолади. Шунингдек, у кейинги жанги Бектемир Мелиқўзиевга қарши бўлишини маълум қилди.
«Кўрамиз, менимча, Мелиқўзиев, кейинги рақибим сен бўласан, дўстим», — деди мексикалик боксчи.
Эслатиб ўтамиз, WBA аввалроқ Мунгияга Никита Зонга қарши титул ҳимоясини ўтказиш учун махсус рухсат берган эди. Ушбу келишувга кўра, Мелиқўзиев мажбурий даъвогар мақомини сақлаб қолди ва мексикалик боксчининг кейинги рақиби бўлиши керак.
Ҳозирча икки боксчи ўртасидаги жангнинг аниқ санаси ва ўтказилиш жойи маълум қилинмаган.
