ФИФА президенти Жанни Инфантино Эрон ва Коста-Рика (5:0) миллий жамоалари ўртасидаги ўртоқлик беллашувига ташриф буюриб, эронлик журналистлар билан суҳбатлашди.
«Шахсан келиб, сизларга шуни айтмоқчи эдим: бутун жаҳон футболи оиласи сизлар билан ҳамдард. Вазиятни тушунаман ва ҳар қандай инсон каби ота ёки она ўз фарзандини йўқотганда бу қанчалик оғир эканини англайман. Бундай шароитда футбол бутун дунё одамлари учун жуда ижобий рол ўйнаши мумкин.
Биз сиёсат билан шуғулланмаймиз, чунки сиёсатчилар эмасмиз. Бизнинг ишимиз — футбол, у орқали қила оладиган энг муҳим ишимиз — одамларни бирлаштириш.
Эрон миллий жамоасининг ўқув-йиғин ўтказаётганидан жуда хурсандман ва оммавий ахборот воситаларида айтганимдек, бизда бу жамоа учун фақат битта режа бор. Эрон Жаҳон чемпионатига йўлланма олган ва ушбу мусобақада иштирок этади.
Шахсан мен барчаси тартиб билан ўтиши учун қўлимдан келган барча ишни қиламан.
Сизлар Эрон халқига жуда муҳим хабар етказасиз. Миллий жамоа уларники. Мамлакатингизда 90 миллион эронлик ва яна миллионлаб инсонлар хорижда яшайди. Уларнинг барчаси ўз миллий жамоаси билан фахрланади. Бу — футбол, сиёсат эмас.
Ҳозирдан бошлаб Жаҳон чемпионатигача мен Эрон миллий жамоасини қўллаб-қувватлаш учун қўлимдан келган барча ишни қиламан. Агар сизлар ўқув-йиғин ўтказмоқчи бўлсангиз ёки хорижда бўлиш билан боғлиқ ҳар қандай масала юзага келса — нима бўлишидан қатъи назар, ёрдам бераман. Исталган вақтда алоқада бўлинг — сизларнинг хизматингиздаман ва ёрдам керак бўлса, албатта кўмаклашаман», — дея Инфантинонинг сўзларини келтиради Алишер Никимбаев ўз телеграм каналида.
