«Барселона» «Атлетико» ҳужумчиси Хулиан Алваресни Роберт Левандовскининг ўрнини босувчи футболчи сифатида кўрмоқда.
Мundo Deportivo хабарига кўра, каталонияликлар аргентиналик футболчи учун 100 миллион евролик таклиф юборган, бироқ «Атлетико» уни рад этган ва ўз позициясини ўзгартириш ниятида эмас.
Клубга яқин журналист Ашраф Бен Аяднинг маълум қилишича, «Барселона» энди трансфер тақдири футболчининг ўзига боғлиқ эканини англаб етган. Агар Алварес клубини ўзгартириш истагини очиқ билдирса ва «Атлетико»га босим ўтказса, трансфер амалга ошиши мумкин.
Шу билан бирга, «Барселона» музокараларни шошилтирмоқчи эмас. Манбага кўра, клуб ёзда Энтони Гордон ва Карим Адейемини ўз сафига қўшгани сабаб ҳужум чизиғида етарлича танловга эга ва Алварес учун белгиланган нархдан юқори маблағ тўлашни режалаштирмаяпти.
Эслатиб ўтамиз, аввалроқ «Барселона» Хулиан Алварес учун 100 миллион евролик расмий таклиф билан чиққани, бироқ «Атлетико» уни рад этгани ҳақида хабарлар тарқалганди.
