«Тоттенҳэм»нинг собиқ бош мураббийи Гарри Реднапп Англия футбол ассоциациясига Пеп Гвардиолани миллий жамоага таклиф қилиш борасида огоҳлантириш билан чиқди.
Тhe Sun хабарига кўра, Реднапп Гвардиолани буюк тактик мутахассис деб ҳисоблашини, бироқ у Англия футболидаги барча муаммоларни ҳал қила олмаслигини айтди.
«Ҳамма Пепни гўёки сеҳрли таёқча деб ўйлайди. У шубҳасиз тактик даҳодир. Аммо уни Англия терма жамоасига олиб келиш билан совринлар автоматик равишда қўлга киритилмайди. Клуб футболида у ҳар доим катта маблағларга эга бўлган. Терма жамоада эса ҳеч қандай чек дафтарчаси йўқ. Сиз фақат мамлакатингиз етиштирган футболчилар билан ишлайсиз», — деди Реднапп Goal нашрига.
Унинг фикрича, Англия Италия йўлидан кетмаслиги учун ёш футболчиларни тайёрлаш тизимига жиддий эътибор қаратиши лозим.
«Италия биз учун огоҳлантирувчи мисол бўлиши керак. Шундай футбол мамлакати кетма-кет учта жаҳон чемпионатига чиқа олмагани даҳшат. Агар эҳтиёт бўлмасак, бизни ҳам худди шундай тақдир кутиши мумкин», — дея қўшимча қилди мутахассис.
Реднапп, шунингдек, Англия миллий жамоаси бош мураббийи Томас Тухелни қўллаб-қувватлашга чақирди.
«Бизда йирик турнирларда ғолиб чиқишга қодир жуда кучли таркиб бор. Пеп ҳақида ўйлашни бас қилиб, Тухелни тўлиқ қўллаб-қувватлашимиз керак», — деди у.
Маълумот учун, Томас Тухел бошчилигидаги Англия миллий жамоаси 2026 йилги жаҳон чемпионатида учинчи ўринни эгаллаганди.
