«Tottenhem»ning sobiq bosh murabbiyi Garri Rednapp Angliya futbol assotsiatsiyasiga Pep Gvardiolani milliy jamoaga taklif qilish borasida ogohlantirish bilan chiqdi.
The Sun xabariga ko‘ra, Rednapp Gvardiolani buyuk taktik mutaxassis deb hisoblashini, biroq u Angliya futbolidagi barcha muammolarni hal qila olmasligini aytdi.
«Hamma Pepni go‘yoki sehrli tayoqcha deb o‘ylaydi. U shubhasiz taktik dahodir. Ammo uni Angliya terma jamoasiga olib kelish bilan sovrinlar avtomatik ravishda qo‘lga kiritilmaydi. Klub futbolida u har doim katta mablag‘larga ega bo‘lgan. Terma jamoada esa hech qanday chek daftarchasi yo‘q. Siz faqat mamlakatingiz yetishtirgan futbolchilar bilan ishlaysiz», — dedi Rednapp Goal nashriga.
Uning fikricha, Angliya Italiya yo‘lidan ketmasligi uchun yosh futbolchilarni tayyorlash tizimiga jiddiy e’tibor qaratishi lozim.
«Italiya biz uchun ogohlantiruvchi misol bo‘lishi kerak. Shunday futbol mamlakati ketma-ket uchta jahon chempionatiga chiqa olmagani dahshat. Agar ehtiyot bo‘lmasak, bizni ham xuddi shunday taqdir kutishi mumkin», — deya qo‘shimcha qildi mutaxassis.
Rednapp, shuningdek, Angliya milliy jamoasi bosh murabbiyi Tomas Tuxelni qo‘llab-quvvatlashga chaqirdi.
«Bizda yirik turnirlarda g‘olib chiqishga qodir juda kuchli tarkib bor. Pep haqida o‘ylashni bas qilib, Tuxelni to‘liq qo‘llab-quvvatlashimiz kerak», — dedi u.
Ma’lumot uchun, Tomas Tuxel boshchiligidagi Angliya milliy jamoasi 2026 yilgi jahon chempionatida uchinchi o‘rinni egallagandi.
