Бангладешда Месси уролмаган пеналтидан сўнг кулиб юборган мухлис ўлдирилди

Бангладешда 2026 йилги Жаҳон чемпионати билан бевосита ёки билвосита боғлиқ бўлган камида 12 та ўлим ҳолати қайд этилди.

38 ёшли Мд Шарифул Ислом Аргентина — Миср (3:2) беллашуви вақтида бошқа мухлислар билан юз берган жанжалдан сўнг вафот этган. Велорикша ҳайдовчиси бўлган Ислом чойхонада ўйин томоша қилаётган пайтда Лионел Мессининг урилмаган пеналтисидан кулиб юборган ва натижадк унга «Аргентина мухлислари» ҳужум қилган. Ислом Бразилия миллий жамоаси мухлиси саналган.

«Футбол деб инсонни қандай қилиб ўлдириш мумкин? Менинг икки нафар қизим бор. Энди улар кимни дада деб чақиришади? Қизларим етим қолди. Турмуш ўртоғимни ўлдирганлар энг қаттиқ жазога тортилишини истайман», — деди унинг рафиқаси Бюти Бегум.

Мамлакатнинг турли ҳудудларида одамлар калтаклашлар, пичоқбозлик ҳужумлари, электр токидан зарарланиш ва йўл-транспорт ҳодисалари оқибатида ҳалок бўлган.

Оммавий ахборот воситалари хабарларига кўра, Фаяз Тажриан Аргентина — Миср ўйинини томоша қилиш учун кетаётганида мотоциклдаги аварияда вафот этган. Мустафо Кази футбол ҳақидаги тортишув вақтида совуқ қурол билан ўлдирилган. Махидул Ислом байрам қилиш вақтида унинг устига футбол дарвозаси қулаши оқибатида ҳалок бўлган.

Ҳабиганж шаҳрида эса маҳаллий футбол ўйинидан кейин Бразилия ва Аргентина мухлислари ўртасидаги тўқнашувларда яна ўнлаб одамлар жароҳат олган.

Маълумот учун, 2022 йилги Жаҳон чемпионати вақтида ҳам Бангладешда мухлислар гуруҳлари ўртасидаги тўқнашувлар натижасида 23 киши ҳалок бўлган.