«Челси»нинг собиқ ҳимоячиси Жон Терри Энцо Мареска истеъфога чиқарилганидан сўнг жамоани вақтинчалик бошқариш имкониятига эга бўлмагани учун ҳафсаласи пир бўлганини тан олди.
Daily Mail хабарига кўра, 2026 йил январ ойида «Челси» Мареска билан хайрлашганидан кейин клуб икки ўйин учун вақтинчалик мураббий этиб U-21 жамоаси устози Калум Макфарлейнни тайинлаган.
Телебошловчи Пирс Морган ушбу қарор Терри томонидан ҳақорат сифатида қабул қилинган бўлиши мумкинлигини айтган. Собиқ футболчи эса бу фикрга қўшилган.
Террининг таъкидлашича, у клубга содиқлиги ва тажрибасини ҳисобга олганда, вақтинчалик мураббий вазифасига муносиброқ номзод деб ҳисоблаган.
Шу билан бирга, «Челси» афсонаси узоқ муддатли тайинловга даъвогарлик қилмаганини ҳам қайд этди.
«Челси» ҳар қандай инсондан каттароқ клуб. Бош мураббий бўлиш учун ҳали тўлиқ профессионал йўлни босиб ўтишим кераклигини тушунаман», — деди Терри.
Маълумот учун, Жон Терри 1998–2017 йиллар давомида «Челси» сафида ўйнаб, клуб тарихидаги энг муваффақиятли сардорлардан бирига айланган. Лондон клуби бош мураббийлигига эса 2026 йил 1 июлдан бошлаб Хаби Алонсо тайинланган.
