Аспиликуэта 36 ёшида футболчилик фаолиятини якунлади

«Севиля» ҳимоячиси Сесар Аспиликуэта бу мавсум унинг профессионал фаолиятидаги сўнггиси бўлишини маълум қилди.

Испаниялик футболчи фаолиятини «Осасуна»да бошлаган, кейин «Марсел», «Челси» ва «Атлетико» жамоаларида ўйнаган. Унинг сўнгги клуби «Севиля» бўлди.

36 ёшли ҳимоячининг фаолиятидаги асосий давр — «Челси»даги 11 йил бўлиб, у Лондон клубида 500 дан ортиқ ўйин ўтказди ва 9 та совринни қўлга киритди. Улар орасида ЕЧЛ, икки карра АПЛ ғолиблиги, Европа Лигаси, УЕФА Суперкубоги ва клублар ўртасидаги жаҳон чемпионати ҳам бор.

Cесар, шунингдек, Испания миллий жамоаси таркибида 44 та ўйин ўтказган.

«Азиз футбол, бугун сен билан бўлишмоқчиман: бу мавсум мен учун профессионал футболчи сифатидаги сўнггиси бўлади. Орзумда яшаган шунча йиллардан сўнг ҳаётимда янги саҳифа очиш вақти келганини ҳис қиляпман.

Ростини айтсам, бу лаҳзага ўзимни тайёрлаган бўлсам ҳам, ушбу мактубни ёзиш мен учун жуда қийин бўлди. 20 мавсум давомида менинг фаолиятимда кўплаб инсонлар муҳим рол ўйнади.

Болалигимда Памплонада мактабдош дўстларим билан биринчи марта тўп тепганимда, олдимда қандай ажойиб саёҳат кутганини тасаввур ҳам қилолмасдим. Ҳар бир лаҳза учун миннатдорман: ғалабалар, оғир мағлубиятлар, синовлар ва энг муҳими — учратган инсонларим ҳамда орттирган дўстларим учун.

Жамоадошларим, мураббийларим ва мен ўйнаган барча клубларнинг ҳар бир ходимига — менга ҳар куни инсон ва футболчи сифатида ўсишга ёрдам беришгани учун раҳмат.

«Осасуна», «Марсел», «Челси», «Атлетико» ва «Севиля» либосларини кийиш ҳамда мамлакатимни йирик турнирларда намойиш этиш мен учун катта шараф бўлди. Ҳар бир лаҳза мен учун жуда қимматлидир», — деб ёзди Аспиликуэта Х ижтимоий тармоғида.