«Манчестер Сити»нинг «Челси» яримҳимоячиси Энцо Фернандес трансфери бўйича таклифи борасида қарама-қарши маълумотлар пайдо бўлди.
Аввалроқ «Челси» «Манчестер Сити» учун Фернандес бўйича якуний муддат белгилаганди. Унга кўра, Манчестер клуби жума куни кечгача 120 миллион фунтлик таклиф юбориши керак, акс ҳолда аргентиналик футболчи Лондон клубида қолади.
Аргентиналик журналист Сезар Луис Мерло эксклюзив маълумотида «Манчестер Сити» Фернандес учун 120 миллион евро, яъни 102,5 миллион фунт таклиф қилганини билдирди. «Челси»нинг жавоби ҳозирча номаълум.
Бироқ инсайдер Фабрицио Романонинг маълумотига кўра, Британия вақти билан соат 16:00 ҳолатига «Челси» Фернандес бўйича «Манчестер Сити»дан ҳеч қандай расмий таклиф олмаган. Бу якуний муддат тугашига 25 соат қолган пайт эди.
Эслатиб ўтамиз, «Челси» Фернандес учун 120 миллион фунтлик таклифни жума куни кечгача кутмоқда.
