Эрон миллий жамоаси бош мураббийи Амир Ғаленойи жаҳон чемпионати гуруҳ босқич 1-тур доирасидаги Янги Зеландияга қарши ўйин (2:2)дан сўнг жамоага дарҳол АҚШни тарк этиш буюрилганини маълум қилди.
Учрашув Лос-Анжелесда бўлиб ўтди. Қайд этиш лозим, жамоанинг иккинчи ўйини ҳам шу ерда Белгияга қарши (21 июнда) ўтказилади.
«Бизга тикланиш учун ҳатто вақт ҳам беришмади. Ўйиндан кейин бизга: «Дарҳол кетишингиз керак», дейишди. Тикланиш вақти жуда муҳим, аммо бизга самолётга ўтириб, Тихуанага қайтиш буюрилди. Бу бизни жиддий хавотирга соляпти.
Ростини айтсам, нега бундай қилинаётганини билмаймиз. Бу менга ғалати туюляпти. Қарорлар FIFAда эмас, балки бошқа жойда қабул қилинаётгандек.
Биз ўйиндан икки кун олдин келиб, ўйиндан кейин бир кеча қолиб тикланишимиз ва эртаси куни тушликкача базага қайтишимиз керак эди.
Нега бундай бўлаётганини умуман тушунмаяпмиз. Бу мундиалда бизнинг жамоага энг кўп босим ўтказиляпти», — деди Ғаленойи.
Шу билан бирга, мутахассис жамоага АҚШни зудлик билан тарк этиш буйруғини ким берганини аниқ айтмади.
Аввалроқ жамоанинг АҚШ ҳудудида бўлиш шартлари маълум қилинганди. Унга кўра, футболчилар фақат ўйин кунларидагина АҚШда бўлиши мумкин.
Жамоанинг машғулот базаси эса Мексиканинг Тихуана шаҳрида (Лос-Анжелесдан 225 км) жойлашган.
