«Бухоро» ҳамда «Насаф» (0:1) клублари иштирокидаги учрашувдан сўнг мезбонлар устози Александр Хомяков матбуот анжуманида қатнашди.
— Ўзингиз ҳам кўрдингиз, шундай эмасми? Жуда ҳиссиётларга бой учрашув бўлди. Бу баҳс турли жиҳатлардан муҳим аҳамиятга эга эди. Бир томондан, дерби, иккинчи томондан, турнир жадвалида ёнма-ён турган жамоалар ўзаро тўқнаш келди. Ғалаба чемпионатнинг якуний қисмидаги кейинги стратегиямиз учун маълум устунлик бериши мумкин эди.
Билмадим, барибир кўнгилда қандайдир афсус қолди. Биз ғалабага яққол лойиқ ўйин кўрсатдик, деб айта олмайман. Аммо мағлубиятга ҳам аниқ лойиқ эмас эдик. Шунинг учун ҳам икки карра афсусдамиз. Ўйиннинг сўнгги қисмида қизил карточка олдик ва маълум маънода диққат-эътибор, мувозанат етишмади. Натижада ўтказиб юборишимиз шарт бўлмаган голни қўйиб юбордик.
Ўйиннинг ўзига келсак, ҳаммаси режамиздагидек кечди, деб айта олмайман. Аслида, 60-дақиқадан кейин ўйин шиддатини оширишни режалаштиргандик. Аммо аксинча бўлди. «Насаф» жамоасининг мураккаб тақвимини ҳам ҳисобга олган ҳолда, учрашувнинг якуний қисмида рақибга янада кўпроқ босим ўтказишни мақсад қилгандик.
Лекин рақиб жамоа бизнинг дастлабки шиддатли ҳужумларимизга ҳам, ўйиннинг ўрта қисмидаги босимимизга ҳам бардош берди. Учрашувнинг якуний қисмида эса устунлик аниқ бизнинг томонда бўлмади. Чунки кўпроқ ҳимояланишга мажбур бўлдик, улар эса ҳимоямизга анчагина ноқулайликлар туғдиришди. Шунинг учун ҳам афсусдамиз. Аммо нима ҳам қилардик, олдинга ҳаракат қилишда давом этамиз.
— Деярли ҳар бир турда, масалан, ўтган турда адашмасам, бешта қизил карточка кўрсатилди. Бу турда ҳам қизил карточкалар сони кўпайиб бормоқда. Бу ҳолатни қандай изоҳлайсиз? Умуман, чемпионатнинг сўнгги турларига келиб футболчиларда асабийлик, чарчоқ ёки шунга ўхшаш ҳолатлар кузатиляптими? Қизил карточкаларнинг кўпайиши мавсум якунига етиб келаётганимиз ва чарчоқ билан боғлиқми?
— Ҳа, албатта. Сизнинг фикрингизга қўшиламан. Қизил карточкалар олиш, албатта, ёқимсиз ҳолат. Футболчилар ҳам инсон, улар ҳам чарчайди. Аввало, маълум даражада ҳиссий чарчоқ тўпланади. Жисмоний чарчоқ ҳам бор. Айрим вазиятларда футболчилар рақибдан ортда қолиб кетади ва шу сабабли нисбатан қаттиқроқ, қўполроқ ҳаракат қилишга мажбур бўлади. Натижада четлатиш ҳолатлари юзага келади.
Буларнинг барчаси мавсум якунига яқинлашиб қолганимиз ва чарчоқ билан боғлиқ. Йигитлар жуда кўп куч сарфлашмоқда, ҳаракат қилишяпти. Ҳеч кимни чемпионатни шунчаки якунлашга уриняпти, деб айбламоқчи эмасман. Ҳар бир учрашувда ғалаба қозониш учун майдонга чиқишмоқда. Шунинг учун уларга нисбатан алоҳида эътирозим йўқ. Бу ҳолатларнинг барчаси, асосан, ҳиссий чарчоқ билан боғлиқ.
— Бугун Рўзиевнинг йўқлиги билинди, деб ўйлайсизми?
— Рўзиевга келсак, унинг ҳисобида тўртинчи сариқ карточка бор эди. Албатта, бу карточка мажбурий бўлган, деб айтолмайман. Шунга қарамай, бугунги учрашувни ўтказиб юборишига тўғри келди ва биз таркибни қайта шакллантиришга мажбур бўлдик.
Афсуски, ҳозирча ярим ҳимоячиларимиз ҳам кўп эмас. Равшан ҳам эндигина машғулотларга киришди, ҳали умумий гуруҳда шуғулланаётгани йўқ.
Қувондиқ Рўзиевнинг эса умумий гуруҳга қайтгани ва бугун майдонга тушгани қувонарли ҳолат. Шу тариқа, лазаретимиздаги футболчилар сони аста-секин камайиб бормоқда. Бу эса таркибда ротация қилиш имкониятини беряпти. Албатта, бу бизни хурсанд қилади.
— Илк бор «Бухоро»га келганингизда жамоани олиб қолиш вазифаси қўйилган эди. Сиз бу вазифани уддаладингиз. Бу йил эса жамоа деярли совринли ўринлар учун кураш олиб бормоқда. Яқинда яна бир хушхабарни эшитдик: жамоа билан шартномангизни узайтиряпсиз. Кейинги йил мухлислар нимани кутишлари мумкин? Жамоа келаси мавсумда янада кучлироқ ҳаракат қиладими? Олдинга қандай мақсадлар қўйилади?
— Тайёргарлик жараёнини режалаштиришимиз керак. Аммо бунинг учун вилоят раҳбарлари билан учрашиб, барча масалаларни муҳокама қилишимиз, уларнинг истаклари ва имкониятларини эшитишимиз лозим. Шундан кейингина келаси йил қандай мақсадлар учун курашишимиз мумкинлигини белгилаб оламиз», - дея Александр Андреевичнинг сўзларини келтиради Tribuna.uz мухбири.
