«Manchester Yunayted»ning sobiq hujumchisi Ueyn Runi Ispaniya milliy jamoasi vingeri Lamin Yamal haqida iliq fikrlar bildirdi.
Yamal JCH–2026 guruh bosqichi 2-turida Saudiya Arabistoniga qarshi bahsda (4:0) gol urib, jamoasining g‘alabasiga hissa qo‘shgandi.
«Messi va Krishtianu Ronalduning hanuz jahon chempionatida o‘ynayotganining sababi ularning futbolga bo‘lgan munosabati va fidoyiligidir. Ular hamma narsani to‘g‘ri qilishdi. Yamal ham shu yo‘ldan borishiga umid qilaman.
Meni eng ko‘p hayratga soladigan jihat shuki, Messi «Barselona»ning o‘sha jamoasiga kelganida, u yerda allaqachon ko‘plab buyuk futbolchilar bor edi va Ronaldinyo ham o‘ynayotgan edi. Yamalning holati esa biroz boshqacha. U «Barselona» va Ispaniya milliy jamoasiga keldi hamda bu allaqachon uning jamoasiga aylangan. U asosiy yetakchi. Hamma unga qaraydi va aynan u g‘alaba keltirishini kutadi.
U Yevropa chempionatidagi g‘alabada juda katta rol o‘ynadi va ushbu jahon chempionatida ham Ispaniya milliy jamoasi uchun muhim figuraga aylanadi.
Meni eng ko‘p taassurotlantiradigan jihat ham shu — u shunday yoshida katta bosimni o‘z zimmasiga olyapti. Endi uning keyingi 15-20 yil davomida ham shu darajani saqlab qolishiga umid qilish qoladi», — dedi Runi.
Eslatib o‘tamiz, Lamin Yamal Saudiya Arabistoniga qarshi bahsda hisobni ochib bergan va jahon chempionatlaridagi ilk golini urgan edi.
Ma'lumot uchun, 17 yoshli futbolchi Yevro–2024 g‘olibi hisoblanadi va hozirda «Barselona» hamda Ispaniya milliy jamoasining yetakchilaridan biri sifatida e'tirof etilmoqda.
