Fransiya milliy jamoasining sobiq futbolchisi Emmanuel Peti «Oltin to‘p» sovrini uchun asosiy da'vogarlar haqida fikr bildirdi.
«Menimcha, bizning milliy jamoamizda bo‘lajak «Oltin to‘p» sohibi bor. Hozir Fransiya milliy jamoasi safida ushbu sovrinni qo‘lga kiritishi mumkin bo‘lgan uch nafar futbolchi bor: Kilian Mbappe, Usmon Dembele va Maykl Olise», — dedi Peti.
Sobiq futbolchining fikricha, ushbu uch futbolchining joriy mavsumdagi o‘yinlari ularni dunyoning eng nufuzli individual mukofotiga asosiy da'vogarlar qatoriga olib chiqqan.
Eslatib o‘tamiz, «Oltin to‘p»ni topshirish marosimi 26 oktyabr kuni bo‘lib o‘tadi. Tarixda ilk bor ushbu tadbir Londonda tashkil etiladi.
Ma'lumot uchun, amaldagi «Oltin to‘p» sohibi aynan Fransiya milliy jamoasi va «PSJ» vingeri Usmon Dembele hisoblanadi.
