O‘zbekiston – Rossiya uchrashuvini tojikistonlik hakam boshqaradi

O‘zbekiston milliy jamoasi 12 noyabr kuni Rossiyaga qarshi o‘rtoqlik uchrashuvida maydonga tushadi. Ushbu bahs uchun hakamlar brigadasi tayinlandi.

O‘FF matbuot xizmati xabar berishicha, Toshkentdagi bahsni tojikistonlik hakamlar boshqaradi.

Uchrashuvda FIFA referisi Gulmurodi Sa’dullo bosh hakam vazifasini bajaradi. Unga qanotlarda FIFA assistentlari Hasan Karimov va Farhod Quralov yordam beradi.

Ma’lumot uchun, O‘zbekiston va Rossiya milliy jamoalari o‘rtasidagi o‘rtoqlik uchrashuvi Toshkentdagi «Paxtakor» markaziy stadionida bo‘lib o‘tadi. Bahs soat 20:00 da boshlanishi belgilangan.

Eslatib o‘tamiz, Fabio Kannavaro boshqaruvidagi «oq bo‘rilar» Rossiya bilan bahsdan so‘ng Saudiya Arabistoniga qarshi o‘rtoqlik bahsida ham ishtirok etadi. Ushbu yig‘inga Abduqodir Husanov va Eldor Shomurodov jalb qilinmagan.