"Manchester Yunayted" "Real"ning ikki nafar yarimhimoyachisi Orelien Chuameni va Eduardo Kamavingaga qiziqish bildirmoqda. Bu haqda El Nacional xabar berdi.
Angliya grandi ancha vaqtdan buyon har ikki fransiyalik futbolchiga da'vogar klublar qatorida tilga olinmoqda. Qayd etilishicha, "qizil iblislar" shu yozda "qaymoqranglilar"ning har ikki yarimhimoyachisini ham o'z safiga qo'shib olish imkoniyatini ko'rib chiqmoqda.
"Real" ikki futbolchining ehtimoliy transferidan jami 150 million yevro ishlab olishni rejalashtirmoqda. Bu mablag' "Manchester Siti"dan Rodri transferini amalga oshirishga yo'naltirilishi mumkin.
Shunga qaramay, Chuameni va Kamavinga hozircha Madridda qolishni afzal ko'rmoqda. Biroq "Manchester Yunayted"ning qiziqishi aniq taklif bosqichiga o'tsa, vaziyat o'zgarishi mumkin.
Avvalroq "qizil iblislar" "Bornmut"ning ikki markaziy yarimhimoyachisini "nishonga olgani" ma'lum qilingandi.
Muxlislar bu yangilikni Telegram’da muhokama qilmoqda
Izohlar Telegram’da ochiladi