«Liverpul» yarim himoyachisi Aleksis Makallister klubdagi kelajagi haqidagi fikrlari bilan o‘rtoqlashdi.
Argentinalik futbolchining «qizillar» bilan amaldagi shartnomasi 2028 yilning yoziga qadar mo‘ljallangan. Avvalroq 27 yoshli xavbek mersisaydliklar hozircha yangi shartnoma borasida muzokaralarni boshlashni istamayotganidan xafa ekanini bildirgan edi.
«Klubda hammasi menga ma’qul kelmoqda. Umid qilamanki, «Liverpul»da ko‘p yillar o‘tkazaman. Ammo oxir-oqibat ikki yildan keyin bu yerdagi faoliyatim yakunlansa ham, bu fojia emas. Men bu vaqtni oilam bilan birga zavq bilan o‘tkazishni istayman. Dunyodagi eng yaxshi klublardan birida o‘ynayotganimni bilaman», — deya Makallisterning so‘zlaridan keltiradi insayder Fabrisio Romano.
Bu mavsumda Aleksis «Liverpul» safida 7 ta uchrashuvda maydonga tushib, 2 ta gol urdi va 1 ta golli uzatmani amalga oshirdi.
